مىندەتتى زەينەتاقى جارنالارى بويىنشا سالىمشىلاردىڭ شوتتارىنىڭ سانى اعىمداعى جىلدىڭ 1-قازانىندا 1003 مىڭدى قۇرادى. وبلىس سالىمشالارىنىڭ زەينەتاقى جيناقتارى جىلدىڭ باسىنان 13,4 پايىزعا ءوسىپ, 501,6 ملرد. تەڭگەگە ۇلعايدى. بۇگىن بۇل تۋرالى وقو وڭىرلىك كوممۋنيكاتسيالار قىزمەتىندە وتكەن بريفينگتە «قر ۇلتتىق بانكى» رمم وق فيليالىنىڭ ديرەكتورى ءانۋار بوتانبەكوۆ ءمالىم ەتتى. بۇل تۋرالى وقو اكىمىنىڭ ءباسپاسوز قىزمەتى حابارلادى.
ءانۋار امانگەلدى ۇلىنىڭ ايتۋىنشا, وڭتۇستىك قازاقستان وبلىسىنىڭ سىرتقى ساۋدا اينالىمى 2017 جىلدىڭ قاڭتار-تامىز ايلارىندا 1,9 ملرد. اقش دوللارىن قۇراعان. سونىڭ ىشىندە ەكسپورت - 720,6 ملن. اقش دوللارى, ال يمپورت - 1 134,4 ملن. اقش دوللارىنا جەتكەن.
«2017 جىلدىڭ 9 ايىندا ۇلتتىق بانكتىڭ التىن ۆاليۋتالىق رەزەۆتەرى 10,2 پايىزعا دەيىن ءوستى. ال ۇلتتىق قوردىڭ شەتەل ۆاليۋتاسىنداعى اكتيۆتەرى 56,8 ملرد. اقش دوللارىن قۇرادى. سونداي-اق, قازاقستاننىڭ سىرتقى قارىزى ءبىرىنشى جارتىجىلدىقتا 4,2 ملرد. دوللارعا ءوسىپ, 167,9 ملرد. دوللارعا جەتىپ وتىر. سونىمەن قاتار, بانكتەردىڭ كرەديت بەرۋ بەلسەندىلىگىن ارتتىرۋ جالعاسىپ كەلەدى. ماسەلەن, جىلدىڭ باسىنان بانكتەردىڭ وبلىستاعى كرەديتتەرىنىڭ كولەمى 4,8 پايىزعا ۇلعايدى», - دەدى ءانۋار بوتانبەكوۆ.
بۇدان بولەك, وڭتۇستىك قازاقستان وبلىسىندا جيناقتالعان ينفلياتسيا دەڭگەيى 9 ايدا 4,8 پايىزدى قۇراعان. بۇل وتكەن جىلعى كورسەتكىشتەن 6,4 پايىزعا تومەن بولىپ وتىر.